Tuesday, November 26, 2013

That's Not The Point!

Baat yeh nahi hai ki tum sundar ho.
Kyunki tumhe tumhaare bare mein bataane baithe,
Toh yeh baat bahut chhoti hai
Kya dhang se tumhe shabdon mein bayaan kar paayenge
Is soch pe shanka bhi hoti hai
Par ab baat karne ki thaan li hai
Der se sahi, waqt ne bhi yeh khwaahish jaan li hai
Kuchh lakeeron ko andekha kardoon
Toh is bhool ko andekha tum kar dena
Kuchh sawaal main khade kar doon, 
Toh unhe jawaabon ki roshni se tum bhar dena


Ab baat yeh nahi nahi ki tum jawaab likh deti ho
Baat toh yeh hai phir bhi kitne sawaal
Hal kiye hain tumne
Kitne hi pareshaan, neeras kono mein
Rang bhare hain tumne
Yeh toh jeevan ke us pehlu jaisa hai
Jo khali bhi, aur dukhdaayi bhi tha
Par jiske bare mein main jaanti nahi thi
Jab tak tumne usko bhar na diya
Dekhi apni achchhai?
Mere jeevan mein ek dukh ko aane se pehle tok diya


Ab baat yeh bhi nahi hai ki tum achchhi ho
Par tum yeh zaroor sikha deti ho
Ki achchhai kya hoti hai
Koi aankhein padh paaye tumhari toh jaane
Ki sachchai kya hoti hai
Par yeh jo aankhein hain tumhari,
Yeh jheel ke khamosh paani jaisi hain
Jinki gehraai maapi nahi ja sakti
Jinki kahaani aanki nahi ja sakti
Kabhi kabhi, khud se hi bhar
Chhalak jaati hain, kuchh kehna ho jaise
Tab darr lagta hai, aur mann kehta hai
Yeh moti sab khud mein sametoon main kaise?


Baat yeh nahi hai ki tum ek kahaani ho
Baat toh yeh hai ki tum mein kisse baste hain
Jeevan ke jo mool hai, who unhi kisso mein toh sajte hain
Ek ek seekh, sabak, ek ek kissa, 
Kitni khubsurti se piroya tumne 
Us mala mein, jo kuchh bhaari zaroor hai
Par amulya bhi, anubhav aur gyaan ratn se
Jiski chamak adrishya zaroor hai
Par jo roshni phailaati hai seedhe antar man se
Kuchh roshni ke kan tumne mujhe bhi diye
Un pyaare palon mein jo tumhare saath jiye


Baat yeh nahi hai ki tum mujhe pyaari ho
Baat yeh hai ki shayad tum khud pyaar ho
Jiska pehla hissa jab mujhe mila tha
Toh samajhne mein thodi der lagi thi
Vishwaas nahi kar pa rahi thi na, 
Jisse dhoondha bhi nahi, woh apneaap dikhi thi
Par ab, tum jitna bhi do
Woh pyaar poora, par kam padta hai
Aur miloon, dekhoon, seekhoon aur jaanoo
Yeh lagaav (jo tumse hai), ab tang karta hai
Mujhe pata hai, tum aisi hi rahogi
Par mere aas paas se kabhi gaayab mat hona
Ek rishta mila hai maayoos sadiyon ke baad
Jaayaz se thoda darna, aur tumse yeh darkhwaast karna
Ki chahe jis raste zindagi le jaaye,
Theek lage, toh mujhe saath le chalna


Akhir mein, baat yeh nahi hai ki tum Aastha ho
Matlab, Aastha toh tum ho hi, 
Par us se kitni zyada ho, yeh batana ab mumkin nahi hoga
Kabhi aur uthayenge phir kalam
Yeh baatein khud tak rakh pana jab aasaan nahi hoga 





This poem came to me on one inspired morning, when I walked out of the warm quilt to tap away on the keyboard my understanding of perhaps the most precious, unexpected gift life sent my way, in her. I wish calling her beautiful, or good, or awesome, or amazing, or even phenomenal was enough. But it is not. Beauty resides so deep within her being, that it makes her glow with a kind of radiance I have not observed in men or women around me. She is different, and rich, and a personification of most manifestations of goodness one can perhaps conceive or conjure. But that's not really the point. I mean, anything I say about her will never be sufficient either to describe what she is like, or to describe what I feel for her. I only, time and again, wish that she, Aastha didi, remains around me always for those doses of inspiration, and those reassuring words of understanding which have come to mean so much to my daily existence. Loving her is a privilege I hope to keep for life. 

Wish you the warmest winters Aastha didi. You've learnt to give the perfect hugs at the perfect time! 

One of those rare times when she is not camera-shy :) 

10 comments:

  1. all i can manage to type is 'Awwwwwww'..... Aapka naya andaaz man ko bha gaya :-)

    ReplyDelete
  2. i agree with Meena... this is such an 'aww' post. You are truly the queen of poetry!

    ReplyDelete
    Replies
    1. Roshan! That is just so huge coming from you. So, very huge!

      Delete
  3. It's beautiful! No wonder she cried.

    ReplyDelete
    Replies
    1. Thanks Neha :)
      Her crying made this poem complete, in a sense.

      Delete
  4. Baat yeh nahi ki kavita kitni khoobsurat hai,
    Baat toh yeh hai ki kitni saadgi se khayal vyakt kiye hain,
    Ki jo aise acchai ko apne shabdo mein kaid karle,
    woh khud kitni lajawaab hogi, yeh mann mera sochta hai.

    ^Random-ness, but you get the point. Kya sundar likha hai!

    ReplyDelete
    Replies
    1. Wah! Bahut khoob - you have added more beauty to my composition Abha! Lovely to have you here.

      Delete
  5. First four lines are exactly what I would've said to you :')

    ReplyDelete